A Mi Lingua
por Gloria Joyce Ascher
En Espanya nasites,
Mi lingua kerida,
Kasteyano de antes,
Del mil i novesientos i noventa i dos,
Kon palavras ebreas--
Spanyol ke avlavan
Los Djidios de Espanya,
Mis antepasados!
D'Espanya fuyeron, ekspulsados,
I los ke surbivieron
Te trusheron d'Espanya a tierras ajenas, leshanas,
Ande pudian bivir--i tu tambien.
Vidas muevas topates
En Izmir, Salonik
Palavras del turko: chanta, karpuz
Ke te enrikesieron.
I kon los ke fueron
A Erets Israel
Tu fuites tambien.
En Medinat Israel te avlan, eskriven,
En la skola ensenyan
I palavras te entran otra vez del ebreo,
De la lingua vieja de los Djidios
Agora biviendo en su lugar.
Tu fuites tambien
Fin asta el Bronx
En la grande sivdad de Mueva York,
Onde nasi
I ande a ti
Vinieron palavras amerikanas.
Onde me vo
Te traygo kon mi
Komo un fostan viejezanko.
Le mankan kolores
Ke tinia antes
Ma me viene mijor
De todos los muevos
Ke me provi.
Aki en Massachsetts
Ande moro i lavoro
Topi los ke avlan!
Ya vienen d'Estanbol i tambien de Israel!
I agora t'ambezo a la universidad!
Ya te aman! Te avlan,
Eskriven poezias,
Kantigas, komedias
Ke retornen las kolores
Del fostan kon unas muevas!--
Lingua kerida,
Mi Spanyol de Sefarad!
Enverano 1999, Mayo 2001
