El Djudeo-Espanyol, Lingua Biva en una Komunita Virtual
por Rachel Amado Bortnick
Ken dize ke la lingua djudeo-espanyola no bive mas? En una komunita virtual yamada LADINOKOMUNITA, esta lengua ermoza no solo se empleya kada diya,ma es la sola lingua ke se aksepta para la komunikasyon. Los miembros de este grupo del Internet, ke biven syenes i miles de kilometros uno de otro, "avlan" i diskuten uno kon otro, se akodra kada dia mezo korespondensya elektronika en esta lengua ke todos entyenden. Kijo dizir ke aki el djudeo-espanyol esta muy biva!
Ladinokomunita fue empesada por esta eskritora (orijinarya de Turkiya) en Enero de 2000, i se espandyo muy presto asta ke oy tiene serka 200 miembros, i este numero va pujando porke mas djente de todas partes del mundo se enrejistran en la lista kuaje kada diya. Toda la korespondensia ke viene es kontrolada antes de ser akseptada para mandar a todos los miembros. Los ke se kargan de kontrolar ("moderators") miran ke todo este eskrito en muestro djudeo-espanyol - refuzan letras en otras linguas - i ke la ortografiya empleyada este asigun es indikada, ke es en la sistema fonetika empleyada por la revista Aki Yerushalayim (la unika publikasion enteramente en djudeo-espanyol.) Ansi ke estos moderators a vezes tanbien redaktan los eskritos.
Ladinokomunita resive i manda korespondensya (mensajes) kada diya. Kualker tema se puede diskutir (mezmo uvo diskusyones sovre la kestyon de Elian Gonzales), mo mas muncho las temas son sovre la lengua i kultura sefaradi: memoryas de la vida sefaradi en Turkiya, Amerika, Rhodes o Salonik; las fiestas Djudiyas, uzos i kostumbres, superstisiones, kumidas, dichas i refranes, diferensyas en byervos i pronunsasion, las raises de siertos byervos, etc. Ay ke dan haber de konferensyas akademikas sovre Ladino (ansi yaman el djudeo- espanyol jeneralmente) o otros aspektos de la kultura sefaradi. Ay ke diskutan un livro, un diksyonayo, o lisyones de Ladino. Poko antes, por egzemplo, mos eskrivyo el profesor espanyol Salvador Santa Puche sovre el kurso de Ladino i su Literatura ke dyo el en la Universita de Tartu, en Estonya. (Siertos de sus elevos se enrejistraron a Ladinokomunita.) La profesora Gloria Ascher de Tuffts Universito mos tiene eskrito sovre el kurso de Kultura Sefaradi ke ensenya eya.
La oportunida de eskrivir en djudeo-espanyol trusho enmedyo el dono espesyal de syertas personas. Entre eyas esta Roz Kohen Drohobyczer ke mos eskrivyo munchas estoryikas nostaljikas i humoristikas, bazadas en su vida en Estanbol en los 1950s. Despues de apareser en Ladinokomunita, estas fueron (i van a ser) publikadas en Aki Yerushalayim, i en la revista "Ke Haber?" de Florida. La korespondensya en Ladinokomunita tiene es komo konversasiones entre amigos i vizinos.
Verdadmente ke djente se izyeron amigos ke no se podiyan konoser de otra manera porke biven en diversos payises - en los Estados Unidos, Amerika Latina, Inglityerra, Espanya, Beljika, Turkiya, Israel, Australia, i mezmo Japonya. Enpasadas se empeso a diskutir la posibilita de azer un enkontro de miembros de Ladinokomunita, i de formar una organizasyon mundial para promover el djudeo-espanyol. Envitamos a todos los ke avlan muestra lingua, o todos los ke enteresan, a ke se adjunten a Ladinokomunita. El abonamiento es debaldes (no kosta nada) i muy fasil. Suscriba aquí.
