Komunidad virtuala del ladino en la Internet
(Artikolo por Moshe Shaul, de Aki Yerushalayim No. 66)
LADINOKOMUNITA: Komunidad virtuala del ladino en la Internet
Kontrariamente a lo ke pensan algunos sosiologos i linguistas en el mundo, segun los kualos el ladino estaria agonizando, esta lengua esta dando ultimamente sinyos de una vitalidad muy enkorajante: son publikados livros, poemas i piesas de teatro; son organizados kongresos i konferensias; se estan avriendo mas i mas kursos para el estudio del ladino, etc.
Uno de los kampos onde esta aktividad parese tener mas shanses de reushidad es la red de Internet i mas partikularmente la komunidad de "Chat" (konversasion) fondada en Estados Unidos el anyo pasado por Rachel Amado Bortnick.
Segun lo konta eya mizma, en un artikolo sovre esta tema, Rachel Bortnick, ke partisipo en Oktobre 1999 al kolokio sovre la grafia i la ortografia del ladino, organizado en Yerushalayim por la Autoridad Nasionala del Ladino, fue tan impresionada por la teza avansada ayi por Moshe Shaul sovre la importansia de la Internet para el futuro de esta lengua ke, a su retorno a Estados Unidos desidio de fondar lo ke en terminos de Internet se yama una lista de Chat - un grupo de personas ke se eskriven de parte a parte por medio de la Internet i tratan de los temas ke los interesan.
Este grupo ke Rachel A. Bortnick yamo "Ladinokomunita"*, tiene por buto de promover la komunikasion en ladino, entre personas ke se topan en kualkera parte del mundo, insistiendo para ke estas komunikasiones sean segun la grafia de Aki Yerushalayim, ke sus reglas son inkluidas komo anekso en kada rezumen de las konversasiones, publikado diariamente. Siendo ke no son munchos ainda los ke konosen esta grafia, los mesajes ke embian son korijados por tres moderadores (Rachel Amado Bortnick, Roz Drohobyczer i David Siman) ke se remplasan a torno de rolo.
Kon el tiempo esta lista ya yego a tener serka de 400 miembros i sus numero esta pujando kontinualmente. Ya es verdad ke no todos partisipan aktivamente. Solo una parte de entre eyos embia sus mesajes mientres ke el resto se kontenta de meldarlos. En desparte de los ke konosen bien el ladino i eskriven frekuentemente, ay tambien algunos sefaradis ke no konosen bien la lengua i se akodran solo un poko de lo ke oyian de sus padres i madres, papus i vavas. Otros son djudios i non djudios ke konosen el espanyol moderno ma se interesan en el ladino i su kultura. Ay tambien espesialistos komo la muzikologa Judith Cohen de Toronto o el linguista Armin Hetzer de Almanya, ke eskriven sovre los temas de los kualos se okupan.
Un aspekto muy enkorajante de la aktividad de esta komunidad es ke se estan djuntandosen a eya mas i mas mansevos i espesialmente estudiantes ke keren anchear sus konosensias en este kampo.
Ladinokomunita tiene munchas posibilidades de aktividad ke no se limitan al kampo linguistiko solamente. Es ansi ke ultimamente se empeso a estudiar la posibilidad de organizar un enkontro de los miembros de esta komunidad, la mayoria de los kualos no se konosen personalmente sino ke a traves de los mesajes ke meldan diariamente en sus kashika postala elektronika. Se espera tambien aprovecharse de las posibilidades de la Internet afin de engrandeser el fondo ke fue kreado para el estudio del ladino i su kultura.
Esta komunidad esta dando tambien la posibilidad a algunas personas ke tienen un buen talento literario i folkloriko, de kontribuyir a la kreasion literaria kontemporanea por medio de kuentos o artikolos ke son inkluidos en los boletines diarios ansi ke en otros medios jurnalistikos. Un buen enshemplo son los muy interesantes kuentos de Roz Kohen Drohobyczer ke ya fueron publikados, despues del Ladinokomunita, en Aki Yerushalayim i tambien en el boletin Ke Haber.
Estos kuentos i artikolos empesaron tambien a ser publikados ultimamente en el sitio de Internet de Sephardic House**, permetiendo ansi a miles de personas interesadas de meldar materiales linguistikos en ladino.
Todo esto no es ainda ke el empesijo solo. Estamos seguros ke esta es una inisiativa ke se dezvelopara muncho mas rapidamente de lo ke pensavamos i puede ser ke sera imitada por otros grupos mas, kon interesos espesiales en uno o otro de los aspektos de la kultura djudeo espanyola. Segun la dicha en inglez, "El sielo es el limito" i no ay duda ke en los anyos vinientes podremos ver dezvelopamientos muy pozitivos en este kampo.
