Vijita de Alhad
por Daisy Alalouf Newell
Una de los mas presiosos rekuerdos ke tengo de mi chikez (de 7 a 11 anyos) eran las Vijitas de Alhad. Kada semana despues de komer de mediodia i arepozar un poko, mos ivamos a vijitar ande alguna amiga, o suvrina, o suegra, toda la famiya para tomar un kafé kon dulse i echar lashon.
No teniamos telefon…ya se aranjava entre la semana onde iva ser la vijita… i en el kamino mos apozavamos ande la pastesiria de Gattegno para merkar unas pastas o marrochinos o masapan para traer a muestra 'hostess'. Eya kon sus ijas preparava la tavla de plata kon los vazos de agua freska, las kucharikas i los dulses o de bimbrio, o de mansana, o de kaysi, o de rosas, o de portukal…i el kafe turko kon kaymak. A, akel kaymak….
Despues de tomar kafe, las mujeres se metian a la kuzina, los ombres a diskutir de la politika o de lo ke esta pasando en Salonika, i los ijos se ivan en otra kamerata a djugar. En vezes se metia las plakas a la viktrola para sentir a la mas mueva plaka ke venia de la grecha i a kantar i bailar a la turka.
A mi me plazia mas mucho kuando ivamos a la kaza de Onkle Albert i Tante Esterina…ke el tanyava mandolin i kantava kantigas en espanyol. El me ambizo las palavras de 'La Paloma', 'La Kukaracha', 'Ay, ay, ay, kanta i no yores', ke asta oy las kanto akompanyandome kon la gitara.
Rekuerdos de me chikez Daisy Alalouf Newell
