DJAMILA a Media Luz
by Roz Kohen Drohobyczer
Me engrandesi en Estambol. Agora bivo en los Estados Unidos. Portanto, las personajes las mas enteresantes ke me akodro son la djente ke konosi en mi chikes.
Djamila, "la femme de ménage" o komo mi madre dizia en Djudio, "la mosa", me tiene deshado una dulse empresyon markada de amargura, ke se arebive kada ves ke siento Julio Iglesias kantar "i todo a media luz".
En los anios de 1950-55 biviamos en un chiko apartamento en Shishane, serka de la Kula en Estambol. Eramos enturados de vizinos i amigos djudios i muslumanos. Las famiyas djudias, mezmo si no eran rikas, empleavan mosaz para alimpiar las kazas. Las mas parte de estas mosaz eran mujeres mansevas y proves muslumanes ke vinian del kazal. Ma, mosotros teniamos una ke era Djudia: Djamila.
Kuando yo tenia 5-6 anios, ami me paresia ke Djamila tenia ochenta! Oy penso ke puede ser Djamila tenia kuarenta o sinkuenta anios. Eya paresia muy vieja, porke tenia kaveyoz grizos, boka sin dientes, era flaka i paresiya hazina. Djamila lavorava muy presto i era konosida por toda la kehila djudia, porke era muy onesta i no rovava de las kazas. La sola ansya ke tenia era el borrachon de marido i por demaziya un ijo haragan a su kargo.
Drawing by the author
Djamila tenia la kara de una brusha, kon la eskova en la mano, la nariz kroshe kon una barruga en la punta, los kaveyos grizos mal penyados i la figura flaka, un sigaro apegado i enkolgando de su musho, i un fishu atado sovre la kavesa, las kalsas godras kayendos sovre sus pachas flakas, un fostan aremendado i charukas ke las arastava en korriendo. Ma kuando avriya la boka, Djamila era el maz dulse personaje ke tengo konosido. Me akodro ke refuzava de asentar a komer kon mozotros, i dizia: "dande se vido ke la mosa se va asentar al pranso kon los panyos". Para mi madre, ke era de una jenerasyon mas moderna i manseva de Djamila la viejizika, estas ideas de maltratar los mosoz kon arebasho, no eran mas popularas. Djamila lavoro en estas kondisyones toda su vida i un dia oyimos ke moz desho la buena vida.
Oy me akodro de Djamila porke kuando aziya su lavoro de alimpiar las kazas de la djente kon grande entusiasmo, kantava esta kantika kon una boz ronka de los sigaros ke fumava: "i todo a media luz, a media luz los doz, a media luz los bezos, a media luz los doz…" Yo me olvidava del marido borrachon i me imajinava de Djamila la dulse, vieja brusha, kon su boka sin dientes, baylando en los brasos de un mansevo alto i ermozo ke la tratava kon respekto, i los dos se bolavan baylando kon allegria, "i todo a media luz".
No se si esta kantika la sustenio a Djamila en su vida dura para olvidar sus estrechuraz de kada dia, ma kada vez ke yo la oygo me akodro de Djamila, penso a sus esuenyos i la kantika me traye este akodro de la chikes i me allegro por unos kuantos puntos.
This article was originally printed in Aki Yerushalayim
