YO SO "Romano"
by Roz Kohen Drohobyczer
Haskeuy, Estambol 1909, Baruh Romano, mansevo en sus 35 anios, demando la mano de Roza Levi. Roza era la mas chika i la mas ermoza ijika de su famiya.Tenia 23 anios, ma, para kazarse, kalia ke asperara ke sus grandes ermanas se kazen en primero. Akel tiempo los dos se fuyeron a Anvers, para kazarsen. Tengo la fotografia del kazamiento: Baruh esta bashiko i flako, kon un mustacho i kaveyos grizos, unos ojos muy pretos. Roza tiene un ayre kompletamente inosente i muy dulse. Es de esta unyon ke tuvo en Anvers, la Beljika, ke nasyo mi Madre Ester.
Baruh peno muncho para reushir en su lavoro, entantanto ke djoyero. Portanto, no pudo… Roza peno a adaptarse a esta vida mueva en tierras ajenas. De sus eskarinyo, los dos kantavan kantikas turkas las nochazas. A los vizindados ke no konosiyan ke estas eran kantikas klasikas turkas, les paresia ke los dos se estavan peleyando i yorando. No pudieron areyevar este egzilo i kuando sus ija, Esterika tenia ocho mezes tornaron a Estambol. En Estambol, moraron en la Kula, ande munchos djudios bivian. Baruh se izo korredor de kazas i asigun me kontava mi madre, de envez en kuando ayudava a un negosyente de papel.
Tuvieron uno ijo en 1920. Este bebe ermozo, kon buklas i ojos pretos dulses, murio de tifo kuando loke tenia dos anios. Ester, ke iva ser mi madre, tenia dodje anios en akeyo tiempo. Eya surbivyo el tifo.
A sigun lo ke oyi de mi madre,Baruh era un padre muy karensyozo, ke kontava konsejikas i paresia syempre yeno de esperansas. El peno muy duro para mantener su famiya. Mismo ke no fue nunka riko, era muy amablo por su ija i su mujer.
Baruh yamava a Esterika “hanuma del padre”, i a su mujer Roza, “Zimbulika”. Murio en 1938, unos kuantos mezes antes de Ataturk. Roza, kedo bivda a 52 anyos. La kara no le aviya riyida del dia de la muerte de su ijo Moris. Kuando kedo bivda, perdio enteramente su esperansa. Vistida de pretos, yorava a kada okazyon. Esto era toda su vida. En estos anios avia gerras mondialas, grandes trokamientos en las politikas de los imperios… i la vida era muy dura. Mi madre kontava ke eya yorava por los dos padres ke pedrio al mizmo tiempo: por Baruh i por Ataturk.
Deke me akodri del papu ke murio munchos anios antes ke yo nasi, ensupito… agora? La semana passada tuve una korespondensia en el Internet, ande fue avizado de una persona nombrada Vitali Romano, i demandando me si teniya kon el un atadijo de familya.
Me fue kontado ke Vitali era el ijo de una tiya grande ke se aviya kazada kon uno de los Romanos. Toda su vida, bivio en Kuzguncuk, un kazal en la parte asiatiko del Bosfor i ande moravan en el tiempo munchos djudyos. Vitali no se aviya kazado. El peno i lazdro toda su vida para tener kargo de su madre, Sara, nasida Funes, ke avia kedada bivda. Era una alma sin pekado, ma ke no fue appresiado por sus serkanos. No tenia muncha enstruksyon, portante saviya avlar en Fransez. Era bonatche, naivo, un poko averguensozo i no le plazia dar enfasyo a la djente. Eyos eran muy proves. Kontavan los groshijikos. “Este kezo para este pan”, komo uzavamos a dizir. Vitali lavoro toda su vida en diferentes echos i kundo aviya echo, lavorava en el Reji(*).
Un diya aviya desbrochada una grande diskusyon entre Vitali i syertos de sus primos, ke tenian una situasyon ekonomika mas boena. Vitali ke avia kedado sin parnasa, desidio de merkarse un azno para kargarlo kon tenekes de agua buena i venderla en Kuzguncuk. Su demando de ayudo para pueder merkarse este azno, aviya provokado una diskusyon muy fuerte. Todos estos serkanos se enkasharon en este pleto… i se izieron a la una, burlandosen kon enyervo de Vitali: ”azno es ke se kere merkar i para kualo se kere… Sakalik(**) es ke va azer?… Dande par ande le vamos merkar lo un azno. Este es kapache de mirar a un azno?…“ i vitali no pudo merkarse el azno. En este tiempo, su kerida mama no estava mas en vida. Despues de unos kuantos anyos, oyimos ke i Vitali Romano se aviya murido subitamento… puede ser, deshando detras de el un remorso nunka avuado, akeyo de aver topado ke le era demaziya de ser patron mizmo de un azno.
Despues de esta korespondensya empesi a pensar a Vitali, el kayadiko ke keria trokar su mazal! En mizmo tiempo, en subito, tuve un presentimiento ke Vitali tenia una koza komuna kon Baruch Romano, mi papu ke ni a el lo konosi. Puede ser ke Baruh, sus ermanos kon sus kreaturas eran un poko differentes de los djudios Sefaradis de la Turkia? En ke manera ser “Romanos”, les aviya enfluensado? Estos dos Romanos, Baruh i Vitali, tuvieron la misma kualitad de ser respektuozos, sin muncha otoritad, sin profesyones i al kontrario del uzo de tener negosyos komo la majoritad de los Sepharadim.
Demandi por la Internet, enformasyones sovre la familya Romano. Mi prima Viki, ke se engrandesyo en Kuzguncuk i ke es la inyeta del ermano de Baruh Romano, me konto ke Baruh Romano tenia munchos ermanos i uno de estos era el padre de Vitali Romano. Me akodri de mi madre, Ester Kohen, nasida Romano, ke uzava dizir kon orgolio “yo so Romano!”. Esto lo diziya para ekspresar su guerkedad i su kapachitad. Por egzemplo si se aviya echo de la kansada para ke le den lugar en el otobus i si aviya reushida. Un dia moz fuimos al banyo turko en Kasimpasha. Estava yeno de mujeres i kalia partajar la kurna kon otras. Mi madre pensava ke no es bueno de partajar la kurna i ke kada una enkasha su tas en la mizma agua. Una manseva turka se aserko de la pila i demando si puede partajar la kurna. Mi madre kon grande jantiyes i kon un Turko enshaguado respondio: “siguro kon plazer grande, solo te dizere ke tuvimos sarna i agora ya estamos buenas i mos vinimos a lavarmos”. Kuando la mansevika oyo esto, dyo pishin la fuyida.
Portanto, esta atitud de mi mama era en kontrasto kon la modestia de mi papu i de su sovrino, Vitali Romano. Despues ke me ambezi ke la alkunya Romano, apartiene a una linya de djudios ke bivian en el imperio de Bizans, munchos siglos antes ke los Sefaradim aviyan ayegado a la tierra Otomana en 1492, pensi ke esto puediya ser una eksplikasyon de este paradokso.
Estas komunitades, konosidas entanto ke Romaniotes, fueron kon el tiempo absorbadas en las komunitades de avla Kastiliano, abandonando ansi, sus linguas, sus tradisiones i sus liturjika. La modestia de estos Romanos de mi famiya prezentava puede ser la sumision a este ordeno muevo ke les fue empozado. De otra parte, la afirmitad de mi madre era puede ser la ekspresyon de la amargura i del revolto kontra esta sumision i de un dezeo guadrado de sintirsen ainda Romanos. Estos eran las dos fachas de un mizmo medalyon.
Siguro, ke esto no es la unika eksplikasyon sovre el karakter de muestros Romanos. A mi me plaze de pensar ke si.
Oy, el aniversario de mi nasimyento, me esto akodrando de esto todo. Los dos Romanos ke nunka konosi, mi papu Baruh i su sovrino Vitali, oy me rankontran para dar me una vijita kurta i dizir me “anyos buenos”, para akodrar me ke “semos Romanos”. Baruh no reusho en komersio, ni Vitali nunka se izo patron de un azno. Portanto, aki esta la prova ke eyos toparon el kamino de muestos korasones, en el muevo Mundo, en el muevo Millenio i alkansaron a la epoka del Internet.
St. Louis, Mayo 2000
(*) De Régie Turque, enstitusyon del governo ke teniye el monopol del komersio de sigaros.
(**) Byervo en Turko, ofisyo de vendedor de agua de bever.
(Rengrasyo a Gad Nassi por sus enformasiones i sus sugjestiones, ansi ke
por aver revizido el teksto de esta eskrita)
